Id-diskussjoni ser tixxandar live.
Il-kelliema jinkludu:
Daniel Cilia, fotografu stabbilit u magħruf għall-kontribuzzjoni tiegħu favur il-preservazzjoni tas-sbuħija, il-kultura, u l-wirt storiku tal-gżejjer Maltin.
Sean Zammit f’isem l-Association for Gozitan Employees in Malta (AGEM)
Mark Farrugia f’isem il-Gozo University Group (GUG)
Joe Muscat f’isem il-Gozo Tourism Association (GTA)
Joseph Borg f’isem il-Gozo Business Chamber (GBC)
Samuel Azzopardi f’isem il-Kunsill Reġjonali t’Għawdex
Alex Torpiano f’isem Din l-Art Ħelwa
Ronald Camilleri, accountant b’MSc f’Environmental Planning and Management u b’esperjenza vasta fis-settur tal-investiment.
Rachel Radmilli, antropologa u lekċerer fi ħdan l-Università ta’ Malta.
Id-diskussjoni se tkun qed tiġi mmoderata minn Karl Azzopardi, ġurnalist mal-MaltaToday.
Kulħadd jagħraf il-bżonn li l-isfidi ta’ konnettività u mobbiltà li jaffaċċja Għawdex u l-Għawdxin jeħtieġ li jiġu indirizzati b’urġenza. Il-Gvern qed isostni li mina għall-karozzi privati hija l-aħjar soluzzjoni għal dawn l-isfidi. Min-naħa l-oħra, hemm min huwa tal-fehma li l-proġett ta’ mina għall-karozzi privati mhux se jkun qed isolvi l-isfidi soċjali u ekonomiċi li taffaċċja l-komunità Għawdxija b’mod ħolistiku u sostenibbli.
Għalhekk, b’kollaborazzjoni mal-MaltaToday, u flimkien ma’ għadd ta’ għaqdiet oħra, fosthom Moviment Graffitti, Din l-Art Ħelwa, Flimkien għal Ambjent Aħjar, Friends of the Earth Malta, BirdLife Malta u The Archaeological Society Malta, qed norganizzaw dibattitu online bejn għadd ta’ kelliema li ġejjin minn oqsma differenti tas-soċjetà sabiex niddiskutu l-implikazzjonijiet ta’ mina għall-karozzi.
Nemmnu li fin-nuqqas ta’ informazzjoni dwar dan il-proġett, hemm bżonn li jinħoloq spazju għal dibattitu miftuħ u pubbliku biex inqisu verament l-implikazzjonijiet tal-mina għal Għawdex u flimkien nippruvaw nwieġbu l-mistoqsijiet marbuta ma’ dan il-proġett.
Saru biżżejjed studji u riċerka li jindikaw li mina għall-karozzi privati hija verament l-aħjar soluzzjoni ta’ konnettività għall-Għawdxin?
B’kemm se jkun qed jonqos il-ħin tal-ivvjaġġar?
Jeżistu alternattivi ta’ mezzi ta’ trasport aktar vijabbli, effikaċi u sostenibbli mill-mina?
Kemm se jkun jiswa n-noll biex wieħed jaqsam bil-karozza minn ġol-mina?
Fid-dawl tal-pandemija u l-effett devastanti li din ħalliet fuq l-ekonomija, il-proġett tal-mina għadu finanzjarjament vijabbli?
X’effett se jkollha fuq is-settur turistiku Għawdxi?
Il-mina se tkun qed twitti t-triq għal aktar żvilupp f’Għawdex?
X’tip ta’ impjiegi u investimenti ġodda se tkun qed toħloq il-mina għall-Għawdxin?
Il-mina se tkun qed taqdi l-bżonnijiet tal-ħafna jew tal-ftit?